Tagesbericht 21.10.2019
Törn: 147.19
Datum: 21.10.2019
Mittagsposition: 37°24,1´(N), 000°49,4´(W)
Das Wetter: leichter Regen, bedeckt
Titel/Überschrift: ein Schweizer an Bord
Met vell Wällegang semmer igschlafe, bevor mr d´0-4 Wach aträtte send. Wachablösig, Segel setze, Usgock bsetze, Kors am Rueder b´halte – ond scho bald se die Stonde döre gsy. Em vieri am Morge esch de Zyt för Blödelei, Neckerei ond Spröche chlopfe – es paar Bier, Kafi o Tee, es Brot, es Stöck Worscht ond chly Chäs ond för dr Stürma Bernd, euse erfahrnigschd, es Müesli, Fröcht, chli Honig, so bliit er fit ond gsond.
Äntli esch Zyt för dr nächschti Schlof, bald aber wärde mer gweckt, dörs Hämmere ond Wärche, em Bootsonderhald dor di öbernäschti Crew. Chly Wasser es Gsecht, chräftig döre Schnuufe, dr Rögge strecke ond dör d´Mess döre stapfe. Bald esch Mettag ond en Blick id „Kombüse“ zeigt, dr Hans am Abrote vo Zweble, Rüebli ond Ragout. Met güebter Hand rüert er met em Schaber, störzt de Riis id´Pfanne, paar Hampfle Gwörz, Paprika ond Pfeffer dry ond dr Eitopf, esch gued abschmöckt ond bereit.
Nach eusere nächschte Wach geids wyter. D´Chällermuus Liz het tief onde em Schiffsrompf ere Souvenir-Shop ufdah ond so gömmer mol go luege, chly go shoppe. Aber es esch we er Stadt, nüd geid, ohni en trääfe Wärbespot dör d´Bordluutsprächer. Em Michael sini flotte Spröch verhälfe so schlossendlech zom Verchaufserfolg, onds ganze Team em Shop, d´Liz, d´Wöschfee Andrea, d´Melanie o dr Matthias, dörfe glöcklech sy – s´het sech glohnt. Mer sys jo schliesslech au.
En Gruess vom Binneländer René